jan Kikamesi li utala e jan Kunwawa jan Kikamesi li jan lawa pi ma tomo Uluku. jan Enkitu li kama tan ma nena. jan Enkitu li jan pona pi jan Kikamesi. ona li jan sama. ona li wawa mute. wile wawa: jan Enkitu li toki ala. ona li pilin ike li pana e telo oko. jan Kikamesi li lukin e ona li toki e ni: “jan sama o, sina pilin ike tan seme?”. jan Enkitu li open e uta ona li toki e ni: “luka mi li kama wawa ala. wawa mi li kama lili”. jan Kikamesi li toki tawa ona li toki e ni: “o tawa! mi tu o tawa nena pi kasi suli. nena ni li weka tan ma ni. ona li lon nasin pi anpa suno. kasi suli mute li lon ma ni. palisa pi kasi ni li sewi li kiwen. kasi suli sama li lon ala ma mi. taso jan Kunwawa li lon nena pi kasi suli. jan li kama tawa kasi suli ni li wile pakala e ona li wile kama jo e ona la jan Kunwawa li utala e ona li moli e ona. jan Kunwawa li ike li wawa mute. mi wile e ni: jan ike li lon ala ma. o tawa sewi nena! sina en mi li utala e ona, li anpa e ona, li moli e ona.” wile pi nimi suli: jan Enkitu li toki e ni:“jan sama o, sewi li wile e ni: jan Kunwawa li lon ma kasi ni. sewi Enli li wile e ni: jan Kunwawa li moli e jan. soweli li tawa lon ma kasi la jan Kunwawa li ken kute e kalama lili weka. jan seme li ken kama lon ma kasi ni? kalama uta pi jan Kuwawa li sama kalama pi telo suli wawa. uta ona li sama seli. kon pi uta ona li sama moli. sina wile utala e jan ni tan seme? mi tu li wawa sama ala jan ni. mi ken ala anpa e ona”. jan Kikamesi li toki tawa jan Enkitu li toki e ni:“jan pona mi o, jan seme li ken tawa sewi pi kon sewi? sewi taso li moli ala. tenpo suno mute pi jan ma li kama pini. jan li moli. jan li pali e ijo. taso ijo ali ni li sama kon. tenpo ni la sina pilin ike tan ni: sina ken moli. wawa sina li lon seme? pona. mi lawa e sina. tenpo moli mi li kama la sina toki e ni tawa mi: o tawa, o pilin ike ala!. jan ike ni li anpa e mi li moli e mi la jan mute li toki e ni: ‘jan Kikamesi li utala e jan wawa Kunwawa li kama anpa li kama moli.’ tenpo kama la jan lili mi li toki e ni: ‘jan Kikamesi li utala e jan wawa Kunwawa’. tenpo mute kama la jan li toki e ni: ‘jan Kikamesi li utala e jan wawa Kunwawa lon nena pi kasi suli li kama moli lon utala ni’. nimi mi li kama suli”. kulupu pi jan sona: jan Kikamesi en jan Enkitu li tawa supa pi ma tomo. jan lawa Kikamesi li toki e ni:“jan ali o kute! mi wile tawa jan wawa Kunwawa li moli e ona. jan li jo ala e mama li jo ala e meli la mi wile e ni: jan ni tawa poka mi”. jan mute li kulupu poka ona. jan Kikamesi en jan Enkitu li tawa jan pali pi ilo utala. ona li pali e ilo suli pi kasi suli e ilo palisa utala suli li pana e ilo ni tawa ona tu. jan Kikamesi li kama lon kulupu pi jan sona pi ma tomo Uluku li toki e ni:“mi wile tawa jan Kunwawa li utala e ona li moli e ona. nimi mi li kama suli. nimi pi jan tan ma tomo Uluku li kama suli”. jan sona li toki tawa jan Kikamesi li toki e ni:“jan lawa o! sina wile utala e jan ike ni tan seme? pilin sina li suli li wawa sama pilin pi jan lili. taso sona sina li suli ala. jan Kunwawa li ike lukin li wawa mute. kalama uta pi jan Kuwawa li sama kalama pi telo suli wawa. uta ona li sama seli. kon pi uta ona li sama moli. sina ken ala anpa e ona. wile sina li pona ala”. jan Kikamesi li toki tawa jan Enkitu li toki e ni:“jan pona mi o! jan ni li toki taso e nimi Kunwawa la ona li pilin ike kin”. ona li toki e ni: “jan sona pi ma tomo Uluku o! mi jan lawa. jan Enkitu li tawa poka mi. ona li kama tan ma nena li suli li wawa. mi tu li ken anpa e jan wawa Kunwawa lon nena pi kasi suli”. jan sona li toki tawa jan Kikamesi li toki e ni:“o tawa! o sewi sina li pana e pona tawa sina!”. sewi Utu: jan Kikamesi li tawa tomo pi sewi Utu. ona li moli e soweli lili li sewi e noka ona. ona li toki e ni:“sewi Utu o! mi wile tawa jan Kunwawa li utala e ona. mi wile e ni: nimi mi li kama suli. sina sona li pona. o pana e pona tawa mi! o kama e ni: mi anpa e jan wawa ni li awen e sijelo pona li tawa sin ma tomo Uluku”. taso sewi li toki ala. jan Kikamesi li pana e telo oko. ona li toki e ni:“sewi Utu o! mi moli e jan Kunwawa la mi toki mute e ijo pi pona sina li pali e sitelen kiwen sina?. telo oko pi jan Kikamesi li pona tawa sewi Utu. ona li toki tawa jan Kikamesi li toki e ni:“jan Kikamesi o pilin pona. mi lawa e kon tawa. mi jo e kon tawa seli. mi jo e kon tawa lete. mi jo e kon tawa telo. mi jo e kon tawa pi ko kiwen lili. mi jo e kon tawa pi tan ma lete. mi jo e kon tawa pi tan ma seli. o tawa nena pi kasi suli! o utala e ike”. sewi Utu li kulupu e kon tawa mute lon insa pi lupa pi nena kiwen. sewi Ninsun: jan Kikamesi li toki tawa jan Enkitu li toki e ni:“jan pona o kama poka mi. o tawa tomo suli pi mama sewi mi”. jan Kikamesi li lawa e jan Enkitu tawa tomo pi sewi Ninsun. ona li kama lon insa tomo li toki e ni: “mama o, mi wile tawa jan Kunwawa ike li moli e ona. o toki pona e ijo mi tawa sewi Utu!”. sewi Ninsun li telo e sijelo ona li len e len pi pona lukin. ona li lon anpa lawa ona e linja sike. sewi Ninsun li tawa tomo sewi pi sewi Utu li sewi e luka li toki e ni:“sewi Utu o! sina li pilin ike tawa ike ali. jan lili mi li wile anpa e ike. jan Kikamesi li wile anpa e jan wawa Kunwawa. o pana e pona tawa jan lili mi”. sewi Ninsun li toki tawa jan Enkitu li toki e ni:“sina jan pona pi jan Kikamesi. sina jan sama pi jan lili mi. jan Enkitu o, sina jan lili mi”. ona li toki e nimi ni:“jan lili mi o tawa poka jan Kikamesi! o pana e pona tawa ona. o utala e ike ali poka ona”. sewi Ninsun li toki e nimi pona wawa li pana e linja sike pi anpa lawa tawa jan Enkitu. nasin tawa pi ma pi kasi suli: ona li kama tawa. jan Kikamesi li lawa. ona li jo e ilo suli pi kasi suli e ilo utala palisa suli. jan Enkitu li tawa lon monsi pi jan Kikamesi. ona kin li jo e ilo pi kasi suli e ilo utala palisa. kulupu pi jan mute li tawa lon monsi jan Enkitu li jo e ilo pi kasi suli. ona li tawa nasin pi tawa nena pi kasi suli. tenpo suno la ona li tawa. ona li tawa weka mute tan ma tomo Uluku. tenpo pimeja li kama la ona li pali e lupa pi telo pona. tenpo suno sin la ona li weka e telo pona lili tawa sewi Utu. sewi li lukin e ona li pilin pona. tenpo suno sin la ona li tawa nasin pi nena pi kasi suli li tawa weka pi mute mute tan ma tomo. tenpo pimeja sin la ona li pali e lupa pi telo pona li weka e telo pona lili tawa sewi. lape pi jan Kikamesi: ona li kama lon nena suli pi loje walo. jan Kikamesi li pana e ko pan pona tawa ma li toki e ni:“nena o pana e lape pona tawa mi!”. tenpo pimeja li kama. jan Kikamesi en jan Enkitu li anpa. ona tu li pilin e luka pi jan sama li lape. jan Kikamesi li pini wawa e lape ona li toki e ni: “jan Enkitu o, sina toki ala toki tawa mi? sina pilin ala pilin e mi? lape mi li pini tan seme? mi lape li lukin e ni: mi utala e soweli wawa. ona li tawa wawa e noka ona li tawa e ko kiwen. tan ni la kon li pimeja. luka mi li wawa ala. mi ken ala anpa e ona. jan ante li tawa mi li pana e telo tawa mi. ona li pona”. jan Enkitu li toki e ni:“jan pona mi o, lukin lape sina li pona. jan Kunwawa li nasa lukin li wawa lukin. taso ona li sama ala soweli wawa ni. soweli wawa pi lape sina li sewi Utu. tenpo utala la ona li pana e pona tawa mi tu. mama sina kin li pana e telo tawa sina. ona li jan lawa Lukapanta”. ma pi kasi suli: tenpo suno li kama. ona li tawa sewi nena li kama lon poka pi ma pi kasi suli. ona li awen li toki ala. ona lukin taso e kasi suli mute. ona li lukin e ni: kasi suli li sewi mute. nasin pona li lon insa pi ma pi kasi suli. tenpo mute la jan Kunwawa li tawa lon nasin ni. noka ona li pali e nasin ni. seli suno li ken ala kama tawa insa pi ma kasi tan ni: kasi ni li suli mute. pimeja ni li lete li pona. ona li tawa lon insa pi ma pi kasi suli. jan Kikamesi li lukin li toki e ni: “ni li kasi suli pona”. ona li kama jo e ilo li anpa e kasi suli. jan Enkitu li weka e palisa tan kasi suli ni. wawa sewi: jan Kunwawa li kute e kalama li pilin ike wawa. ona li toki wawa e ni: “jan seme li kama lon ma mi li pakala e kasi suli mi?”. jan Kunwawa li pana e wawa sewi tawa kalama ni. wawa sewi ni li sama kon li sama suno. ona li tawa sama ilo moli linja. jan Kikamesi li kama anpa li lape. jan Enkitu li lape. jan ante pi tan ma tomo Uluku li lape sama soweli pona lili. jan Enkitu li pini e lape. kalama ala li lon. ona li pilin e jan Kikamesi kepeken luka ona. jan Kikamesi li tawa ala. jan Enkitu li toki wawa e ni: “jan Kikamesi o! jan sama o! tenpo pi suli seme la sina li lape kin?”. jan Enkitu li tawa wawa e ona li toki wawa tawa ona. jan Kikamesi li open e oko ona li tawa sewi. ona li toki e ni:“ike a! jan ni li jan ma anu jan sewi?”. jan Enkitu li toki e ni:“jan Kunwawa li wawa mute. jan pona o tawa ala jan ni! mi mute o tawa weka tan ma ni. o tawa ma tomo Uluku”. jan Kikamesi li toki tawa jan Enkitu li toki e ni: “mi wile lukin e jan ni, li utala e ona. o pilin pona. jan tu li ken ala moli. sina en mi li ken anpa e ona”. utala li kama: sewiUtu li toki tawa jan Kikamesi li toki e ni:“o awen ala! jan Kunwawa li len e wawa sewi wan taso. ona li jo e wawa sewi mute lon tomo ona. sina awen la ona li ken len e wawa sewi ali. o tawa!”. ona tu li tawa wawa tomo pi jan Kunwawa. jan Kunwawa li tawa ona. jan Kikamesi li toki wawa e ni:“mi jan Kikamesi li jan lawa pi ma tomo Uluku! jan Kunwawa ike o kama moli!”. ona li wile utala e jan Kunwawa kepeken ilo utala palisa. jan Enkitu kin li kama tawa utala poka ona. taso ona li ken ala utala e ona. jan Kunwawa li tawa wawa weka tan nasin pi ilo utala. kalama uta ona li sama kalama pi telo suli wawa. uta ona li sama seli. ona li utala la ma li pakala. nena suli li tawa. kon li kama pimeja. jan Kikamesi li pilin ike li pana e telo oko. ona li toki e ni: ”a! ona li wawa mute. mi ken anpa ala e ona. sewi Utu o! o pana e pona tawa mi!”. kon tawa mute: sewi Utu li kute e toki pi jan Kikamesi. ona li weka e kon tawa mute tan insa pi lupa pi nena kiwen. kon tawa seli li utala e jan Kunwawa. kon tawa lete li utala e ona. kon tawa telo li utala e jan Kunwawa. kon tawa pi ko kiwen lili li utala e ona. kon tawa pi tan ma lete li utala e jan Kunwawa. kon tawa pi tan ma seli li utala e ona. kon tawa mute li utala e jan Kunwawa. ona li ken ala tawa. tenpo ni la jan Kikamesi en jan Enkitu li ken tawa ona li ken utala e ona kepeken ilo utala ona. jan Kunwawa li awen. sinpin pi lawa ona li kama pona lukin. ona li toki e ni:“jan Kikamesi o kute e mi! jan lawa wawa o moli ala e mi! mi sona ala e mama mi. nena suli li mama mi. sewiAn li wile e ni: jan li wile pakala e kasi suli ni la mi utala e ona li moli e ona. o pilin ike ala tawa mi! mi wile e ni: sina jan lawa mi. mi anpa e kasi suli mi li pana e ona mute tawa sina. o moli ala e mi. o weka e mi”. moli pi jan Kunwawa: jan Kikemesi li pini pilin e ike tawa jan Kunwawa. ona li toki tawa jan Enkitu li toki e ni:“jan li kama jo e waso lili la jan li wile weka e ona li wile e ni: ona li tawa mama ona - la ni li pona ala pona?”. jan Enkitu li toki e ni:“o kute ala e jan Kunwawa. ona li ike. o weka ala e ona. sina weka e ona la ona li pakala e nasin tawa ma tomo Uluku lon ma ni li utala e mi mute”. jan Kunwawa li toki e ni:“jan Enkitu o, toki sina li toki ike li toki utala. jan lawa sina li pana e moku tawa sina. tan ni taso la sina tawa lon monsi ona. tan ni la sina wile ala e ni: jan Kikamesi li jan lawa pi mi kin. jan anpa o! o toki ala!”. jan Enkitu li pilin ike wawa. ona li utala wawa e jan Kunwawa kepeken ilo utala palisa li weka e lawa ona tan sijelo ona. jan Kunwawa li anpa lon ma. kasi suli mute li kalama sama pilin ike. nimi suli: jan Kikamesi en jan Enkitu li kama jo e lawa pi jan Kunwawa li lon pini palisa e ona. ona li tawa li lon noka pi sewi Enli e ona. sewi Enli li lukin li toki e ni:“sina moli e ona tan seme?!”. ona li toki ike tawa ona tu li toki e ni:“o seli li pakala e sinpin sina! o seli li moku e moku sina! o seli li moku e telo sina!”. sewi Enli li kama jo e wawa sewi pi jan Kunwawa li tawa weka. jan Kikamesi en jan Enkitu li anpa e kasi suli. jan pi ma tomo Uluku li pali poka ona. jan Enkitu li toki e ni:“sewiUtu li pona mute. mi wile pali e sinpin suli pi lupa pi tomo ona. kasi suli ni li pona mute tawa pali ni”. ona mute li anpa e kasi suli mute. ona li kama jo e kasi suli mute li tawa telo linja Pulatu tan nena pi kasi suli. ona li wan e kasi suli mute li pali e supa tawa mute. ona li tawa lon supa ni li tawa e ona lon telo linja kepeken palisa. nasin ni la ona li tawa lon telo. tenpo suno pi mute lili pini la ona li kama lon ma tomo Uluku. jan mute li kulupu li toki e ni: ”o lukin! o pilin pona! ona li jan utala pona kin!”. nimi ona li suli.

meli lili pi len loje lipu pi jan sama tu Grimm ante toki pi jan Same - mi wile pana e pona tawa jan ni: jan Kipo jan Lope jan Tepan. ona li pona e ante toki mi. sike suno nanpa 2019. tenpo la meli lili li lon. meli lili ni li pona tawa jan ali. nanpa lawa la meli lili li pona mute tawa mama mama meli ona. mama mama meli ona li pana e ali tawa ona. tenpo pini la mama mama meli li pana e len loje tawa meli lili ona. meli lili li kepeken len ni la ona li kama pona lukin. tenpo ni la meli lili li wile ala e len sin. ona li wile e len loje ni taso. tenpo kama ali la ona li jo e nimi: “meli lili pi len loje”. sike suno ante la mama meli pi meli lili li toki e ni: “jan lili mi o kama! ni li moku. o pana e moku ni tawa mama mama meli sina. ona li pilin ike. sina pana e moku ni la ona li kama pilin pona. o tawa! taso... o tawa wawa ala tan ni: moku li kama anpa la mama mama meli sina li jo ala e moku. mi wile e ni: sina tawa kepeken tenpo mute. insa pi tomo ona la o toki e nimi «toki!» tawa ona.” meli lili li toki: “tenpo kama la mi tawa pona.” mama mama meli pi meli lili li lon ma pi kasi suli. meli lili li lon open pi ma kasi ni. tenpo ni la soweli li kama. meli lili li sona ala e ni: ona li ike mute. tan ni la meli lili li pilin ike ala. soweli li toki: “meli lili pi len loje o toki!”. “soweli o, ni li pona tawa mi.” “sina lon insa pi ma kasi ni tan seme?” “mi tawa mama mama meli mi.” “insa pi len sina li jo e seme?” “moku. tenpo suno pini la mi mute li pali e moku suwi. mi mute li pali e moku tan ni: mama mama meli mi li pilin ike.” soweli li toki: “mama mama meli sina li lon seme?” meli lili li toki: “jan ali li sona e ni. mama mama meli mi li lon insa pi ma kasi ni. tomo ona li lon poka pi kasi suli. kasi suli ni li jo e kili pimeja mute.” soweli ike li pilin e ni: “meli lili li pona lukin. ona li moku pi pona mute tawa mi. mama mama meli ona li moku pi pona lili tawa mi. mi wile e ni: mi moku e meli lili e mama mama meli.” soweli en meli lili li tawa. soweli li tawa lon poka meli lili. soweli li toki: “o lukin! kasi kule li pona lukin lon ma pi kasi suli ni. ken la sina ken lukin. a! sina o kute e kalama musi waso. kalama ni li pona mute. sina tawa wawa lon nasin ni. ken la sina ken tawa kepeken tenpo mute. ken la sina ken weka tan nasin. o weka, lon ma pi kasi suli. o lukin e waso e kasi. mi pilin e ni: ni li kama pona mute tawa sina.” meli lili pi len loje li lawa e oko ona. ona li lukin e suno lon kasi e waso e kule pi ma kasi ni. meli lili li toki: “ken la mi ken pana e kasi kule tawa mama mama meli mi. ken la ona li pilin e ni: «kasi kule li pona tawa mi!», mi jo e tenpo mute, mi ken kepeken tenpo mute.” meli lili pi len loje li weka tan nasin. ona li tawa lon ma pi kasi suli. tenpo sama la soweli ike li tawa wawa kepeken tenpo lili. ona li tawa tomo pi mama mama meli. ona li kalama e supa pi lupa tomo. mama mama meli li toki: “jan seme li lon?” soweli li toki: “meli lili pi len loje li lon, mi jo e moku suwi e telo! o open e lupa!” tomo pi mama mama meli mama mama meli li toki: “a! sina ken open e lupa. mi wawa ala, mi ken ala open e lupa.” soweli li open e lupa li kama lon insa. soweli li toki ala li tawa supa lape pi mama mama meli. ona li moku e ali pi mama mama meli. tenpo kama la soweli ike li kepeken len pi mama mama meli li kama lon insa pi supa lape. tenpo sama la meli lili li pilin e ni: “a ike! mi kepeken tenpo pi mute mute a! tenpo ni la mi jo e tenpo ala! mi tawa tomo mama mama mi!” meli lili li kama lon sinpin tomo. tenpo ni la lupa li open. tan ni la oko pi meli lili li open mute. meli lili li kama lon insa tomo li pilin nasa li toki: “tenpo ante la lon poka pi mama mama mi la mi pilin pona. taso... tenpo ni la mi pilin nasa mute.” meli lili li toki: “toki!” taso jan ala li toki sin tawa ona. tan ni la meli lili li tawa supa lape. lon ni la mama mama meli pi meli lili li lape. lawa ona li lon insa pi selo len. ona li nasa lukin mute. meli lili li toki: “a! mama mama o! sina jo e nena kute pi suli mute!” “kepeken ni la mi ken kute pona e sina.” “taso, mama mama o, sina jo e oko pi suli mute!” “kepeken ni la mi ken lukin pona e sina.” “taso, mama mama o, sina jo e luka pi suli mute!” “kepeken ni la mi ken luka pona e sina.” “a! taso, mama mama o, sina jo e uta pi suli mute!” “a! kepeken ni la mi ken moku pona e sina!” soweli ike li toki e ni la ona li kama wawa tan supa lape. ona li moku e meli lili ali. tenpo moku pini la ona li kama lon supa lape li lape. soweli li lape la ona li kalama lape mute. tenpo sama la jan alasa li tawa lon poka tomo. jan alasa li pilin e ni: “meli pi tomo ni li kalama mute. ken la ona li wile e ijo.” jan alasa li kama lon insa tomo. ona li kama lukin e soweli lape. jan alasa li toki: “a! soweli ike o! sina lon ni tan seme a?! tenpo suli la mi wile moli e sina!” jan alasa li wile kepeken ilo moli tawa soweli. taso... ona li kama pilin e ni: ken la mama mama meli li lon insa pi soweli ike. ken la tenpo ni la mama mama li moli ala. tan ni la ona li kepeken ala e ilo moli. ona li kepeken ilo kipisi. ona li kipisi e sijelo pi soweli lape. insa pi soweli ike li kama tu la jan alasa li lukin e meli lili pi len loje. ona li kama tan sijelo pi soweli ike. meli lili li toki: “a! mi pilin ike mute! insa soweli li pimeja mute!” mama mama meli kin li kama. tenpo kama la meli lili li alasa e kiwen mute. ona li pana e kiwen tawa insa pi soweli ike. soweli ike li kama lape ala la ona li wile tawa wawa. taso... lon insa pi soweli ike li jo e kiwen mute. tan ni la ona li ken ala tawa li kama moli. soweli li moli la jan tu wan li kama pilin pona. jan alasa li kipisi li kama jo e selo soweli. jan alasa li tawa tomo ona. mama mama meli li moku e moku suwi e telo pi meli lili. meli lili pi len loje li pilin e ni: “tenpo kama ali la mi awen lon nasin pi ma kasi ni. tenpo kama ali la mi weka ala tan nasin. mama mi li toki lawa e ni la mi weka ala lon ma pi kasi suli.” tenpo sin la meli lili li pana kin e moku tawa mama mama sina. ona li tawa lon nasin sama. soweli ike ante kin li lon nasin ni. soweli li wile ike. taso... meli lili pi len loje li sona pona. meli lili li tawa wawa li lukin ala e soweli ike. lon tomo pi mama mama ona la meli lili li toki e ijo pi soweli ike sin tawa mama mama meli ona. mama mama meli li toki: “a! o pini ali e supa lupa pi tomo mi. mi wile ala e ni: soweli ike li kama lon insa.” tenpo kama la soweli li kalama e supa pi lupa tomo. soweli ike li toki: “o open! mi meli lili pi len loje! mi pana e moku suwi!” taso meli lili en mama mama meli li toki ala. tan ni la soweli li sike e tomo li kama lon lawa tomo. ona li wile awen e tenpo pimeja. ona li wile e ni: tenpo pimeja la meli lili li kama tan tomo la soweli li moku e ona. taso... mama mama meli li sona e ni. lon sinpin tomo la lupa kiwen suli li lon. mama mama meli li toki: “tenpo suno pini la mi pali e moku kepeken telo seli. o pana e telo seli pi moku mi kepeken poki lili. o pana e telo seli ni tawa insa pi lupa kiwen suli.” meli lili pi len loje li pana e telo seli tawa lupa kiwen suli. lupa kiwen suli li kama jo e telo mute. kon pi telo seli li sama moku pi tenpo suno pini. soweli ike li pilin e kon. ona li kama tawa lupa kiwen suli. soweli ike li lukin e insa pi lupa kiwen suli. lawa pi soweli ike li tawa anpa. taso, noka ona li ken ala awen lon open pi lupa kiwen suli. soweli ike li tawa anpa wawa li kama lon insa pi telo mute. soweli ike li moli lon telo. tan ni la meli lili pi len loje li pilin pona li tawa tomo ona. tan ni la tenpo ali la ike li kama ala tawa ona.

toki sewi pi lon nena toki sewi pi lon nena tan lipu pi jan Matu pi lipu Pipija tan kipisi nanpa luka tawa kipisi nanpa luka tu 5:1-2 jan Jesu li lukin e kulupu la ona li tawa sewi nena li anpa e monsi sama. jan ona li kama tawa poka ona. jan Jesu li pana e sona tawa jan. ona li toki e ni: 3 ‘jan mute li sona e ni: ‘insa mi li ike’. jan ni li pona. lawa sewi li ijo ona. 4 jan mute li pilin ike. sewi li pona e pilin ona. 5 jan mute li sona e ni: ‘mi anpa’. jan ni li kama jo e ma tan sewi. 6 jan mute li wile pona. sewi li pona mute tawa jan ni. 7 jan mute li pona tawa jan ante la jan ni li pona. pali ike ante pi jan ni li lili tawa sewi. 8 jan mute li wile ala sona e ike. jan ni li lon poka sewi. 9 jan mute li wile pini e utala. jan ni li jan lili sewi. 10 jan mute li pona. taso jan ike li pakala e jan pona ni. jan ni li jo e lawa sewi. 11-12 jan li ike tawa sina la ona li toki e ike tawa sina tan ni: sina sona e mi-; taso sina pona mute la o pilin pona. o pilin pona mute tan ni: sina jo e ijo pona lon ma sewi. tenpo pini la jan mute li ike tawa jan pona ante kin. 13 sina kiwen moku tawa jan ali. taso pona pi kiwen moku li weka la sina ken ala sin e ona. pona pi kiwen moku li weka la sina ken ala kepeken ona. jan li pana e ona tawa nasin lon anpa pi noka jan. 14 sina suno ni: jan pi mi ali li lukin e sina. sina ma tomo lon sewi nena ni: jan li wile lukin e ona. 15 jan li lon ala anpa poki e suno. ona li lon palisa suli e ona. ona li suno e tomo. 16 sama la sina suno tawa jan ali. sina pona la jan ante li lukin e sina li toki e ni: ‘sewi li pona.’ 17-18 mi wile ala pakala e lawa pi jan Mose e sona pi jan toki sona. mi wile ala pakala e sona ona. mi wile lon e ona. ma sewi en ma ni li lon la lawa sewi ali li awen. ali li pini la lawa sewi li pini kin. 19 ken la sina pali ala e ijo lili pi lawa sewi. ken la sina toki e ni tawa jan ante: ‘o pali ala e ijo lili pi lawa sewi.’ sina toki e ni la sina lili lon ma sewi. taso sina pali e ijo ali pi lawa sewi li pana e sona pi lawa sewi tawa jan ante la sina suli lon ma sewi. 20 mi toki e ni tawa sina: jan sona pi lawa sewi en jan Palisi li pali e ijo pi lawa sewi. taso sina wile tawa ma sewi la sina wile pali mute e ijo pi lawa sewi. 21 sina kute e ni: ‘o moli ala e jan. sina moli e jan la sewi li ken pakala e sina.’ 22 taso mi kin toki e ni tawa sina: ‘o pilin ala utala. sina pilin utala la sewi li ken pakala e sina. sina toki e ijo ike tawa jan la kulupu lawa li ken pakala e sina. o toki ala e ni: ‘ona li nasa.’ sina toki e ni la sina ken tawa ma anpa seli ike.’ 23-4 ken la sina lon tomo sewi li wile pana e ijo pona tawa sewi. taso sina sona e ni: sina ike tawa jan ante. o awen lon tomo sewi e ijo pona sina. o tawa jan ante ni. sina pona tawa jan ante la o kama sin tawa tomo sewi. tenpo ni la sina ken pana e ijo pona sina tawa sewi. 25-6 jan li wile kama e sina tawa kulupu lawa la o pona tawa jan ni. tenpo lili la sina wile pona mute tawa ona. sina ken ala la jan sona lawa li pana e sina tawa jan wawa lawa. jan wawa lawa li awen e sina lon tomo awen ike. sina pana ala e mani ali la sina ken ala tawa tan tomo awen. 27 sina kute e ni: “o unpa ike ala.” 28 taso mi kin toki e ni tawa sina: mije li lukin e meli li wile unpa ike e ona la mije ni li ike. 29 oko sina li kama e ike sina la o weka e ona. sina jo ala e oko. taso sina ike la sijelo ali sina li tawa ma anpa ike. 30 luka sina li kama e ike sina la o weka e ona. sina jo ala e luka. taso sina ike la sijelo ali sina li tawa ma anpa ike. 31 tenpo pini la jan li toki e ni: “sina wile ala e meli sina la o pana e lipu pi wile weka tawa ona.” 32 taso mi kin toki e ni tawa sina: meli li unpa ike la mije ona li ken weka tan ona. taso mije li weka tan meli ona tan ijo ante la mije ni li kama e ike unpa. meli li weka tan mije ona la o jo ala e meli ni. sina unpa e ona la sina ike. 33 sina kute e ni: “sina toki e ijo la o lon e ona. sina toki e ijo tawa sewi la sina wile lon e ona.” 34-5 taso mi kin toki e ni tawa sina: sina toki e ijo la o kepeken ala e toki wawa. o toki ala wawa kepeken ma sewi. ma sewi li ijo sewi. o toki ala wawa kepeken ma. ma li dijo sewi. o toki ala wawa kepeken ma tomo Jelusalen. ona li ijo sewi. 36 o toki ala wawa kepeken sijelo sina. sina ken ala ante e kule pi linja lawa sina. 37 o toki e nimi “lon” anu “ala” taso. toki namako li tan jan Setan ike. 38 sina kute e ni: “jan li weka e oko pi jan ante la o weka e oko ona. jan li weka e kiwen uta walo pi jan ante la o weka e kiwen uta walo ona.” 39 taso mi toki e ni tawa sina: jan li wile pakala e sina la o utala ala e ona. ona li utala e luka wan la o pana e luka ante sina. 40 jan li wile kama jo ike e len sina la o pana e len tu. 41 jan utala li kama ike e ni: sina wile jo e poki suli ona lon nasin wan. taso o jo e ona lon nasin tu. 42 jan li wile e ijo la o pana. 43 sina kute e ni: “o pona tawa jan pona sina. o ike tawa jan ike sina.” 44-5 taso mi kin toki e ni tawa sina: o pona tawa jan ike sina. jan li ike tawa sina la o wile e pona tawa ona. sina ken la sina sama mama sina lon ma sewi. 45 ona li kama e ni: suno li sewi. jan pona en jan ike li ken lukin e ona. ona li kama e ni: telo li kama anpa tan sewi. jan pona en jan ike li ken pilin e ona. 46 sina pona tawa jan pona sina la sewi li wile pana e ijo pona tawa sina tan seme? jan pi jo mani ike kin li pona tawa jan pona ona. 47 jan ali li pona tawa jan pona ona. jan mute li sona ala e sewi. taso jan ni li pona tawa jan pona ona. 48 mi toki e ni: sina wile pona. o pona sama mama sina lon ma sewi. 6:1 o kute! sina pali e ijo pona la o kama e ni: jan ante li ken ala lukin e sina. jan li lukin e sina la mama sina li pana ala e ijo pona tawa sina lon ma sewi. 2 sina pana e mani tawa jan pi mani ala la o toki ala. jan mute li pana e mani li kalama mute. ona li wile e ni: jan ali li lukin. ona li wile e toki pona pi tan jan ali. 3 sina pana tawa jan pi mani ala la o kama e ni: jan ante li sona ala. 4 mama sina li ken lukin li pona tawa sina. 5 sina toki tawa sewi la o toki ala wawa. jan mute li toki wawa tawa sewi lon nasin en lon tomo sewi. ona li wile e ni: jan li kute e ona. 6 sina toki tawa sewi la o tawa tomo sina. o pini e lupa. sewi li lon. ona li ken kute li pona tawa sina 7 sina toki tawa jsewi la o toki ala sama jan pi nasin ante. ona li toki mute e ijo sama. ona li pilin e ni: “mi toki mute e ijo sama la sewi li kute e mi.” 8 o sama ala ona. mama sina li sona e wile sina. 9 o toki sama ni: mama mi o, sina lon ma sewi. o nimi sina li sewi. 10 o lawa sina li kama. sina wile e ijo la o ona li lon. o ona li lon ma ni en ma sewi. 11 o pana e moku pi tenpo suno ni tawa mi. 12. o ike mi li lili tawa sina. sama la ike pi jan ante li lili tawa mi. 13 o mi li wile ala ike. o weka e mi tan jan Setan ike. 14-5 kin. ike pi jan ante li lili tawa sina la ike sina li lili tawa jsewi. taso ike pi jan ante li suli tawa sina la ike sina li suli tawa sewi. 16 sina moku ala la o pona lukin. jan pi nasin ike li wile ike lukin. ona li wile e ni: jan li sona e ni: ona li moku ala. 17-8 sina moku ala la o telo e sinpin sina. o pona lukin. jan ala li sona e ni: sina moku ala. taso mama sina li sona li pona tawa ni. 19 o awen ala e ijo pona lon ma ni. pipi en jaki li pakala e ijo sina. jan li ken kama jo ike e ijo sina tan tomo sina. 20 kin la o awen e ijo pona lon ma sewi. pipi en jaki li ken ala pakala e ijo sina. jan li ken ala kama jo ike e ijo sina tan tomo sina. 21 kon sina li lon poka pi ijo sina. 22 suno li kama tawa sijelo kepeken oko. oko sina li pona la sijelo sina li suno mute. 23 taso oko sina li ike la sijelo sina li pimeja. suno sina li kama pimeja la pimeja ni li pimeja kin. 24 sina ken ala jo e jan lawa tu. sina kama pilin e ni: “jan lawa ni li pona. taso jan lawa ante li ike.” sina ken ala pali tawa sewi en tawa mani. 25 mi toki tawa sina: sina wile e moku e len. taso o pilin ala ike tan ni. lon sina li suli. moku li lili. sijelo li suli. len li lili. 26-7 o lukin e waso. ona li pali ala e kasi lon ma. taso mama sewi sina li pana e moku tawa ona. waso li lili. taso sina suli kin tawa sewi. pilin ike li pona ala tawa sina. 28-9 sina pilin ike tan ni: sina wile e len. taso tan seme? o lukin e kasi kule ni. ona li pali ala. ona li pali ala e len. taso jan lawa Solomon li jo ala e len pona sama len pi kasi kule ni. 30 ni li kasi taso. tenpo kama lili la jan li seli e ona. taso sewi li pali kin e len pi pona lukin tawa kasi ni. ona li pali e len tawa kasi la ona li pali e len pona tawa sina. sina sona ala e pona sewi! 31-2 o toki ala e ni: “moku mi li kama tan seme? en len mi?” jan pi nasin ante li toki e ni. ali li pona. mama sewi sina li sona e wile sina. 33 o wile e ni: sewi li lawa. sina wile e ni la ona li pana e ijo ante ni ali tawa sina. 34 o pilin ala ike tan ijo pi tenpo suno kama. o lukin e tenpo suno ni taso. tenpo suno kama la o lukin e tenpo suno kama. 7:1-2 ike pi jan ante li lili tawa sina la ike sina li lili tawa sewi. taso ike pi jan ante li suli tawa sina la ike sina li suli tawa sewi. 3-5 sina lukin e jaki lili lon oko pi jan ante. taso sina pilin ala e palisa suli lon oko sina. tan seme? palisa suli li lon oko sina la o toki ala e ni tawa jan ante: “mi wile weka e jaki lili ni tan oko sina.” sina ike! o weka e palisa suli tan oko sina. sina weka e ona la sina ken lukin pona li ken weka e jaki lili tan oko pi jan ante. 6 o pana ala e ijo sewi tawa soweli. ona li utala e sina. o pana ala e ijo pona tawa soweli. noka jaki ona li lon ijo sina. 7 sina wile la sina jo. sina alasa la sina kama lukin. sina kalama la lupa li open. 8 jan li awen toki e wile ona la ona li kama jo. jan li awen alasa la ona li kama lukin. jan li awen kalama la lupa li open. 9-10 sina jo ala jo e jan lili? ona li wile e pan la sina pana ala pana e kiwen? ona li wile e kala la sina pana ala pana e akesi? ala! 11 sina ike. taso sina pana e ijo pona tawa jan lili sina. sewi li pana mute kin e ijo pona tawa jan ona. 12 sina wile e ijo tan jan ante la o pana e ni tawa jan ante. lawa Mose en jan toki sona li toki e ni. 13 o kepeken e lupa lili. lupa suli en nasin mute li tawa ma anpa ike. jan mute li lon nasin ni. 14 taso lupa pona li lili. sina tawa lon nasin pona la ijo mute li wile pake e sina. jan mute li ken ala tawa lon nasin pona. 15 jan toki sona ike li lon. ona li sama soweli pona. taso ona li soweli utala ike. 16 sina lukin e pali pi jan ni la sina sona e jan ni. ijo pona li kama ala tan jan ike. sama la kili pona li kama ala tan kasi ike. 17 kasi pona li pana e kili pona. kasi ike li pana e kili ike. 18 kasi pona li ken ala pana e kili ike. kasi ike li ken ala pana e kili pona. 19 jan li anpa e kasi ike li seli e ona. 20 sina lukin e pali pi jan ike ni la sina sona e ni: jan ni li ike. 21 jan mute li toki e ni: mi jan lawa. taso sina wile tawa ma sewi la o pona tawa sewi. 22 tenpo suno pi nanpa pini la jan mute li toki e ni tawa mi: “jan lawa o a! mi mute li weka e kon ike li pali e ijo pona mute!” 23 mi toki e ni tawa ona: “mi sona ala e sina. sina ike. o tawa weka tan mi!” 24-5 sina kute e toki mi li pona la sina sama jan sona. jan sona li pali e tomo ona lon kiwen. telo mute li kama tan sewi. telo mute li lon. kon wawa li lon. taso tomo pi jan sona ni li lon kiwen li awen. 26-7 sina kute e toki mi li ike la sina sama jan nasa. jan nasa li pali e tomo ona lon ko. telo mute li kama tan sewi. telo mute li lon. kon wawa li lon. tomo pi jan nasa li anpa. anpa kin a! tp: jan Pije kepeken jan Pilo, jan Mali, jan Kipo

waso laso en akesi jelo en pipi loje li kule e sitelen mi sitelen e ni tan seme. mi wile kepeken e nimi ali pi wawa pona lon toki ni. ken la mi pu ala, taso ni li lili tawa mi. waso laso li lon palisa pi kasi suli li lon selo pi tomo ona. waso laso li kalama musi. waso laso li jo e jan pona. ona li akesi jelo li pipi loje. soweli ali ni li lon kulupu sama. ni li kulupu pi pali sitelen kule. ona li jo e ko kule mute pi ona sama. ijo pali e sitelen kule li pona tawa ona. kulupu lili ni li jo e mani lili. ona ali li wile pana e mani li kama jo e ko kule e telo kule lon esun suli. ona ali li toki e ni: mi o tawa esun. mi o mani e ko e telo kule. ona li jo e mani lon poki lili pi waso laso. ona ali tawa esun. ona li kama jo e ko kule e telo kule la ona li tawa sin tomo. ona li open pali e sitelen kepeken kule mute. kule pi ko ni li kule loje li kule laso li jelo li pimeja li walo. jan pona li kule e sitelen pi m. sitelen ni li jo e suno suli e kasi suli e mun e nena e telo suli e soweli mute kin. ona li pali e sitelen nasa kin la ona ali li mu musi mute. sitelen ni ali li pona mute tawa akesi jelo tawa waso laso tawa pipi loje. ona sitelen pini la ona li wile moku. tenpo ni la ona li wile pana e mani li kama jo e ijo moku. tenpo sin la ona li tawa esun li luka e poki len. ona li wile jo e ijo moku lon insa pi poki len. ona li weka e sitelen e ko kule e telo kule li tawa tan tomo li tawa esun suli. ona li jo e kala, e sijelo moli seli pi ko namako e pan suwi e telo kili lete. ona li pana e ijo ni lon insa pi poki len suli pi waso laso. ona li kama jo e ijo la ona li tawa tomo pi waso laso. waso laso li wile moku e kala. akesi jelo li wile moku e sijelo moli pi ko namako. pipi loje li wile moku e pan suwi. ali li wile moku e telo kili lete. ni li pona mute tawa ona. pipi en akesi li olin sama. pipi loje li mije. akesi jelo li meli. taso akesi li suli, pipi li lili la ona li ken ala unpa sama. olin pi ona li suli mute. waso li jo ala e olin. taso ona li pilin pona li jo ala e olin. ona pilin e ni: olin li pali mute li tan pi telo oko mute. ona li mu musi lili. waso laso li kule li toki insa mute lon tenpo sama. kala li kule ala e sitelen tan seme? kala li jo ala e luka. ona li ken ala kule e sitelen nasin sama pi jan pona ante. kala taso ken tawa lon telo suli. telo suli li pona mute tawa kala. jan pona li ken ala tawa insa pi telo suli. akesi jelo en pipi loje en waso laso ali li wile tawa lon insa pi telo suli sama kala kin! taso ali li ante. ali li ken pali e ante. ali li ken ala pali e ante a! ni li lon a! waso li ken tawa sewi lon kon li ken ala tawa lon insa pi telo suli. kala li ken tawa lon insa pi telo suli li ken ala tawa sewi lon kon. tenpo suno li pini. waso laso li wile lukin e lipu pona. pini tenpo suno en tenpo pi kama pimeja la ni li pona tawa ona. taso ona li sona ala e ni: ona li wile lukin e lipu seme. ona li jo e lipu tu. lipu nanpa wan li pona. lipu nanpa tu li ike, taso ona li sona ala lipu seme li lipu nanpa wan. ni li ike mute tawa ona. ona li pilin pakala mute ona li mu wawa. ona li lukin e mun. ona li sona ala pali e seme. ona pakala e lipu tu ali. ona wile tawa supa lape. ona li wile lape, taso noka ona li wawa ala mute. ona toki e ni: mi lape lon ni anu mi tawa supa lape. mi sona ala. ona li kama lape lon sinpin pi ilo sitelen tawa. ni li nasa mute tan ni: mi pilin e ni: ona o tawa poki telo. ona o telo e luka e noka e kiwen walo, taso ona li pali ala. ona li kama lape. ona li ante lili e linja sewi ona, li telo ala e sijelo la ona open lape. sina pilin e seme: ni li pona anu ike? mi pilin e ni: ni li ike li jaki li nasa a! waso laso li soweli pi sike suno mute la ona li ken pali e ante. ona li ken telo e sijelo ona nasin sama pi soweli suli! ni li nasin pi jan lili a! ni li jaki nasa! taso ona li soweli suli. soweli suli sama jan suli li pali kepeken wile open ona a! taso tenpo pimeja ni, la jan pona ona, akesi jelo en pipi loje li awen monsi ona lon tenpo mute. ona li musi mute, taso ona li luka e ona tawa supa lape. jan pona pi waso laso li pona mute. ona li lon sinpin ona li toki e ni. jan pona mi li nasa lili anu seme? ona li jaki lili anu seme? ona li nasa mute anu seme? ona li mu musi mute. waso laso li lape. ona pini e pali pi kulupu ona pi tenpo suno ni. ona ali li moku pini e pan suwi e telo kili lete pi tenpo suno ni. tenpo ni la kon li pimeja. mun walo suli li lon kon pimeja. ni li pona lukin. pipi mije en akesi meli ante e sijelo e nasin. ona li wile tawa selo li wile tawa tomo ona. ona li wile lape lon sama lon tomo pi ona tu. ni li pona tawa ona. taso tenpo ni la ona li jo e nasin suli e nasin pi wile kepeken tenpo mute lon sinpin ona tu. ona tu li wile tawa kepeken noka. akesi jelo en pipi loje li jo ala e tomo tawa. ni li musi! akesi en pipi li tawa e tomo tawa! ni li lon ala a! ni li musi nasa a! mi ali mu a! taso ona tu li sona ala e musi mi. ona li lon nasin li tawa nasin tawa tomo ona. ona tu tawa lon tenpo mute la ona li wile moku e ijo, taso ona tu li jo ala e ijo moku lon poki. poki ona li jo e kon. taso ona tu li wile jo e kili loje tan kasi suli lon poka pi nasin suli. ona tu li awen li tawa lon jaki pi poka nasin. ona li kama jo e kili loje lili tan kasi suli. ona tu li pilin pona mute li pana e kili loje lon poki lili pi akesi jelo. ijo ante kin pi akesi jelo en ijo pi pipi loje li lon insa poki sama. ni li ko kule pi kulupu pi pali sitelen kule. poki ni li lon monsi akesi. supa ni li pali suli pi akesi jelo lili. taso ona li ken awen e pali ni lon monsi lon tenpo pi tawa tomo. ona li weka tan tomo pi waso laso li tawa tomo ona. ona tu li tawa lon nasin li toki sama. ona li wile pali li kama jo e mani tan ni: ona li wile kule e sitelen mute lon sike suno mute lon tenpo kama. ona li wile kule e sitelen nasa e sitelen pona lukin. ijo wan la ona li pilin ike la ona li ken ala unpa sama. pini la ona li meli en mije. lon li ike lili tan ni tawa ona tu. ken la akesi jelo en pipi loje li kama jo e nasin pi unpa sama lon tenpo kama. ni li pini pi toki lili ni pi soweli pi jan pona mi. mi wile e ni: sina lukin e ni la sina ken lukin pona e nimi pi wawa pona.